लपलासी कोठे

आता होतासी 

लपलासी कोठे

सख्या पांडुरंगा

शोधू तुज कोठे

 

लपंडाव देवा

का खेळिसी

पोच माझी नाही

तुज शोधू मी

 

मन ना निर्मल

बुद्धी ना विमल

मी दुर्बल सर्व ठायी

कागा विठाई परिक्षिसी

 

धरी हात आता

का देसी चिंता

भवार्ण तरावया

मज बळ नाही

 

जरी तु देवा

आला न भेटीस

नाव रख्माईस

बघ सांगेन मी

 

या उपरी जरी

तू न कृपा करी

चंद्रभागा कुशीत

देवा जाईन मी

 

'मेघ' म्हणे देवा

तिढा सोडवा हा

खेळ तो मांडावा

किती तव भक्ताचा

 

रविवार, ३१/०३/२०२४  , ०५:३२ AM

अजय सरदेसाई (मेघ)

परमात्मा परात्परू

परमात्मा परात्परू

पाविजे मज लौकरू

मी विश्वाचे लेकरू

प्रार्थी तुझे ठायी

 

तव चित्त चिदंबरू

काया ती अगोचरू

ते चक्षू सोम-सुर्यु

तुज देखिजे केवी

 

मज नको अष्ट सिद्धी

मज नको नव निधी

सदा जवळिक तुझी

देई कृपाळा

 

सहस्रसाराचा परिमळु

परमानंद आळुमाळु

मिळो दे रे कृपाळू

नित्य  मज

 

तूची सदा सर्वकाळ

करशी माझा संभाळ

माझे तुची आभाळ

न करी आबाळ

बालकाची

 

आता सरते शेवटी

तव एकची विनंती

मुक्ती द्यावी गोमटी

सायुज ती

 

 

चिदंबर = आकाश

अगोचर = पार्थिव नेत्रांस न दिसणारे

चक्षु = डोळे

सोम-सुर्यु = चंद्र-सूर्य

देखिजे केवी = कसे पाहावे

सहस्रार = सहस्त्र दल कमल

परिमळु = सुगंध

आळुमाळु = थोडं थोडं

शुक्रवार , २९/०३/२०२४  ०६:२५ PM

अजय सरदेसाई (मेघ ) 

शेवटचा पाश

 

मला आणले जेथे ते स्मशान होते

कळले शरीर माझे गतप्राण होते

चौथऱ्यावर होती चिता मांडलेली

प्रेत माझे ज्यावर जणू सामान होते  

दक्षिण दिशेस होती मांडली पिंडे 

कावळे झाडावर का सावधान होते

सोपस्कार सर्व उरलेले पूर्ण झाले 

शरीरास नमुन लोकांचे प्रस्थान होते

दुःखात काही,ओठांवर काही स्मित

जाणे काय मना त्यांच्या अवधान होते

पेटली शेवटी ती चिता जी होती शांत 

शेवटचा पाश तुटला ,वर अस्मान होते   

 

गुरुवार , २८/०३/२०२४   , ०१:४८ PM

अजय सरदेसाई (मेघ )

वैतर्णी

तू हे जिवन मैथुन जाण

ते जीवाने मिथ्या जगावे

इच्छा सुटण्याची होता 

सद्य शरीर लागते सोडावे

 

घालमेल होत असे जिवाची

न जाणो ते काय घडावे

स्वर्गा ची ईच्छा असता

नर्कात स्व:कर्माने न्यावे

 

कोण हिशेब ठेवील याचा

जीवास कसे सर्व ज्ञात रहावे

तो चित्रगुप्त जी देईल शिक्षा

जिवास ते सर्व लागे भोगावे

 

जेव्हा शरिराचे होते कलेवर

पोहचतो जीव वैतर्णी घाटावर 

त्या वैतर्णी चा प्रवाह विक्राळ

उठती ज्वाळा न दिसे तळ

 

एक ही नाव नोहे घाटावर

जीवास पोहचणे पैलतीर

भले भले थरथरले वीर

पिण्यस इथे न मिळे निर

 

पुढचा जन्म कोणता जीवाचा

नी कोणत्या योनीत मिळावा

दुर्गुणात लिंपुन जीव राहता

घाणित किडा तो वळवळावा

 

जीवाने कर्मरहित असावे

सदा नामःस्मरण ते करावे

कुकर्मा पासून दूर राहावे

धर्म परायण सदा असावे

 

असे केल्यास न कोणती चिंता

देह सोडताच जीव पावे अनंता

तो असे वैतर्णी पासून खूप दूर

परम ईश तो परमानंदाचा चे पूर  

 

बुधवार , २७/०३/२०२४  ०९:३५  AM

अजय सरदेसाई (मेघ )

सुखावलो तव दर्शने देवा

 

सुखावलो तव दर्शने देवा आता न मज काही खंत ।

आणि काय मागु देवा मागण्यास ना काही अंत।।

तु असतांना काय उणे देवा समाधानी माझे चित्त।

जोवर तुझा हात मस्तकी माझ्या मी राहतो निवांत।।

नाम तुझे घेता दिसे तुझे रुप ते अनंत।

"मेघ " म्हणे तव दर्शने मी झालो बहु श्रीमंत ।।

येणे जाणे नुरले आता झालो मी तटस्थ ।

ज्ञानेंद्रिय सर्व उलटी होऊन पडली आत निचेष्ठ ।।

 

 ।।अवधूत चिंतन श्री गुरुदेव दत्त।।

 

बुधवार,०६/०३/२०२४ , १०:१५ PM

अजय सरदेसाई (मेघ)