मज दर्शन दे रे दिगंबरा श्रीदत्ता

मज दर्शन दे रे दिगंबरा श्रीदत्ता

तिमीरांत कुठे मज सोडूनि गेला ताता

पाहुनी तुझी वाट नयन थकले आता

मज दर्शन दे रे दिगंबरा श्रीदत्ता

का तव चरणांची ओढ मला लाविली

का जन्म अगणिक आस मला दाविली

लपलास कुठे मम प्राण हरून आता

राहीन सुखे जरी तव श्वान होऊन आता

मज दर्शन दे रे दिगंबरा श्रीदत्ता

वेडावून चित्ता का भक्ती दिधली मजला

जर तुम्हांस दर्शन नव्हते देणे मजला

स्मृतगामी म्हणोन बिरुद असे जगजेठी

तरी तुम्ही मजला काहो ना देता भेठी

तव विरहाने प्राण कंठाशी आले आता

मज दर्शन दे रे दिगंबरा श्रीदत्ता

न दिससी परी अस्तित्व तुझे जाणविसी

निज स्वरूप केव्हा मज दाखविसी

अंत समयी असूदे तुझीच मूर्ती हृदयी

साठून राहूदे नयनांत हा मम कैवारी

पुरे झाला रे फेरा जन्म-मरणाचा आता

मज दर्शन दे रे दिगंबरा श्रीदत्ता

कुठे तिमीरांत मज सोडूनि गेला ताता

तुझी वाट पाहुनी नयन थकले आता

मज दर्शन दे रे दिगंबरा श्रीदत्ता

शनिवार , दिनांक २/९/२०२३ , १२:१५

अजय सरदेसाई ( मेघ )

Spirituality and US - अध्यात्म , वेदांत आणि आपण